Ang GKK Sr. Santo Niño dinhi sa Purok 1, Poblacion
natukod niadtong Agosto 30, 1985. Si Timoteo Gomez ang nangulo sa pagtukod sa
kapilya ug kauban niya sila Pastor
Pericano ug Lito Halasan ug kining mga tawhana ang nagsabot-sabot nga
magbayanihan o magtinabangay aron matukod ang GKK o kapilya, kauban ang mga
miyembro.
Kadaghanan aning mga tawhana gikan sa kabisay-an. Ug sila
nag amot-amot aron makapalit ug materyales alang sa pagtukod sa maong kapilya.
Ang mga katigulangan
diri sa Purok 1 Poblacion Malapatan nagsabot-sabot nga magtukod ug
kaugalingong GKK o kapilya kay tungod daghan man sila nga nagpuyo niining
puroka. Kay kaniadto man gud ang taga Purok 1 ug taga Purok 2 usa ra ilang GKK
o Kapilya nga mao ang GKK Santa Cruz. Busa nahukman sa mga katigulangan dinhi
sa Purok 1 nga magtukod ug kaugalingong GKK pinaagi pud sa sugyot ni Fr. Fred
Maghanoy, aron daw ang dili makasimba sa dakong simbahan diha na lang sa
GKK manimba.
Human matukod ang GKK Sr. Santo Niño diri sa Purok 1, ang
mga kabatan-onan nagsabot-sabot aron sa pagpili ug mga opisyales nga maoy
mangulo sa mga kalihukan. Ug nasabutan sa mga kabatan-onan nga kung magpadulong
na ang fiesta, magpabayle sila aron ang income ipalit ug mga gamit alang sa
kapilya. Ug naay koronasyon sa Little Niña sa mismong kasaulugan.
Sr. Santo Niño
Si Rogelio Legaspi mao ang nagpili sa patron nga si Sr.
Santo Niño, tungod kay deboto sila sa maong patron, Enero 15 ang kapistahan sa
maong patron. KRISKA, CYM ug ALAY KAPWA, mao ang mga ministriya nga anaa sa
among GKK sa pagkakaron.